May
10
6-8-րդ դասարաններ, ուսումնական պլանի դիտարկումներ
Ուշադիր ընթերցելով 6-8-րդ դասարանների ուսումնական պլանը` ողջունում եմ երեխաների ուսումնական օրը այդքան բազմազան դարձնելու և երեխաների նախասիրություններին մեծ տեղ հատկացնելու դպրոցի դիրքորոշումը։ Ունեմ որոշակի դիտարկումներ, որոնք սիրով ներկայացնում եմ։ Առաջարկում եմ.
- Երկու օտար լեզվի ընտրությունն էլ թողնել աշակերտին։ Քանի որ ռուսերենը ճիշտ նույնպիսի օտար լեզու է, ինչպես անգլերենը կամ ֆրանսերենը կամ ցանկացած մեկ այլ օտար լեզու, դպրոցն էլ որդեգրել է օտար լեզվի ուսուցման ընտրության հնարավորություն տալը, անհասկանալի է ընտրությունը 50%-ով սահմանափակելու քաղաքականությունը և ռուսերենը պարտադրելը սովորողին։
- Հայոց լեզու առարկայի դասավանդման ընթացքում մեծ տեղ հատկացնել բառուսուցմանը, բառերի քերականությանը, ուղղագրական կանոններին։
- Մայրենի և Հայ գրականություն առարկաների շրջանակներում բարբառներով, արևմտահայերենով, գրաբարով և միջին հայերենով ընթերցանությունը բացառապես ոսուցչի վերահսկողությամբ կատարվի, ուղեկցվի տվյալ ժամանակաշրջանի և տարածաշրջանի լեզվական կանոնների ուսումնասիրությամբ և լինի ոչ մեծ ծավալի։ Անցյալ տարիների մեր փորձառությունը ցույց է տալիս, որ երեխան լիովին չի ընկալում ժամանակակից արևելահայերենից տարբերվող կանոններով ընթերցածը, և այդպիսով ընկնում է կարդալու մոտիվացվածությունը առհասարակ։
- Հետևողական լինել դպրոցում տնային աշխատանքների ստուգման գործում։
- Քանի որ շատ են արշավները, սպորտային գործունեությունը, մեծ է երեխայի ֆիզիկական ինքնուրույնությունը ուսումնական ողջ պրոցեսում թե դպրոցում, թե դպրոցից դուրս (և այս ամենը շատ ողջունելի է), մեծացնել ուշադրությունը սովորողների ֆիզիկական անվտանգությանը, հատուկ միջոցներ ձեռնարկել։
- Մեսրոպատառ ձեռագիրը հայոց լեզվի մեծագույն արժեքներից է։ Թույլ չտալ, որ սովորողների մոտ կորսվի ձեռագրի կարողությունը։
- Սահմանափակումներ մտցնել համացանցի կարգավորումներում, կանխել մուտքը ուսումնական պրոցեսի հետ կապ չունեցող և որոշակի վտանգներ պարունակող կայքեր, աշակերտների համար կազմակերպել մեդիագրագիտության դասընթացներ։
Հարգանքով,
Աննա Ջավախյան (սովորող Նելսոն Խաչատրյանի մայրիկ)